Church History

Tuhoi LNBA-M Centre church, Namraining (Tamei) Chiujiu kubambo phumling hai Namraining namdi gara raithubo khatdi dithubo phumling khat thiujiu tuhoi bamme. Disumakbo jat khat thiujiu bamdi mathiu aruangjiu aliu tu kadampao Tingwang tien thiuraleng kaden khaibo bam khat thiujiu bamdi-e. Tingwang niu nampao dung lungchun gadi npao khaijiu Chiang(Langmai) nai Piulekluang (Tamah) mainiu lungsuibo leng charam pikhai jiu Mn.N.Hujubou nai pasairiupiu Mn. N. Angambou niu 1956 kum wang lungrai bam di-e, khatdi panai sai lamsu niuTahung, Diging, Kingwangbou, Taleping, Mazatbonang, Sangjinbou, Apingbou, Kendinang, Apokbou, Namlemang, Sangkhomang, Sangjunang,  Arow, Achong, Silakbou, Aliang, Lewangbou, Hotpuibou, Hotliangbou khatdi Mathat haichiu jiu chamai lungwang jiu paliuhai 1960 wan gara home fellowship thiujiu Rapiu tu kahum bam niu-e, haibo sai chamai lungwang makeng subo ga khristian mainah dung thiubo jeng niu Chara tu kahum raboky phumling bam mak sai doulak-e tiujiu jengtung 3 september 1961 kum Phumling lingsu khaide. Khatdi katingmai kathiubo niu N.Hujubou tu phumling gu Jupao, Pastor pi thiukhai de, khatdi Kahuky thiulu makbo jengniu Mn. Kendinang kiruang ga wangjiu chara tu kahumbo ky thiujiu Tamei Baptist Church tiujiu ku bam di-e, haichiujiu 1962 kum Mn. Namniathon, Tale, Poudirai, Kingwangbou, Diging, Mazatbonang khatdi Tahung paliu niu phumling gu Executive members khatdi Phungjakham, Lalthang, N.Palmai paliu niu phumling tu macha manang khaijiu bamdi-e. jentung 2 july 1963 naisu phumling gu Secretary Phungjakham kyga pakak khat leng madui bam thiu khai lanjiu bambo ga Tamei Hq Baptist Church thiulujiu jengtung 8 February 1964 nai Mn. Poukhokam Kipgen SDC. Aimol niu Church dedicated thiukhai-e haichiu jia Kahuky samijiu thiulan lu makbo pawan khatga Mn. Arow kiga 1971 gasu rent pikhai jiu bam khai-e, pating pawan sai suijiu Church jandi kaili lanjia Station Baptist Church chiujiu kulan mi-e. 1980 kumTamei Hq Baptist Church tiujiu kulan lulan lujiu jengtung 27^th April 1980 nai Church jan hai Tamei Hill Town Baptist Church kura mathak khai lanjiu THTBC tiujiu kulan mi-e. mathiu aruang bambo ga jengtung 28^th April 1984 kum church member khangsia niu mengtang wangtang lakbo bam kami jengniu Church tam mira kheng wangjiu mathiu gu kasuibo gasu paliu hai Church tam mide. Jengting 30-12-1994 gasu Church leng Town Baptist Church kulan raleng chap khai lujiu ku bambo ga Liangmai Naga Baptist Association lamsu Centre Church thiukhaira kheng wangjiu 26^th  August 1995 meeting gasu suikhaijiu jengtung 4^th february 1996 gasu LNBA-M Centre Church chiubo janthin kujiu wang mibo-e. pahang ga kaliwang mibo phumling jan dungsi lenkhai lan bam-e

1. Tamei Baptist Church                         3^rd Sept. 1961
2. Tamei Hq. Baptist Church                  8^th Feb. 1964
3. Station Baptist Church                       1976-1979
4. Tamei Hill Town Baptist Church        27^th April 1980
5. Tamei Town Baptist Church               30^th Dec. 1994
6. LNBA(M) Centre Church                  4^th Feb. 1996.

LNBA-M Centre church, Tamei karai dou station Baptist church, Tamei chiujiu kubamdibo wan ga Rev. Mp. Namthiurai field Director ZBA, niu Administrator thiu jiu jentung 5th April 1979 (Thursday) nai organise church thiu khaide khatdi program leng jeng gasu katam-tambo field/church gasu wangkhai maidung pahang ga lien khai ye.

1. Rev. Mp. Namthiurai        - Field Director, ZBA
2. Mp. Impeurei                    - Treasurer cum clerk ZBA
3. Rev. Hupaubou Newmai  - Field Secy. NCF
4. N. Disonang                      - Treasure cum clerk NCF
5. ID.Thonbui                       - Youth Promoter NCF
6. Ap. Thomray                     - Pastor L. Pabram
7. Nk. Sying                          - Bible translator (Liangmai)
8. Mn. Dangpibou                 - Pastor Konphung
9. Chaliupingbou                   - Elder Konphung
10. Ngantang                          - Pastor, Langmaei
11. Rangkambou                     - Pastor Malek

Haichiujiu ZBA gu Administration thinmai dungniu aliugu phumling tu chalungsa jiu Rapiu janga phumling tan khangrabo leng akhi khaibibo jeng niu tuhoira parasy masipad jiu haikumbo Golden jubilee ngoutang jiu bamme.